ჩვენს შესახებ
grass

საფეხბურთო კლუბი "საბურთალო"

 

საფეხბურთო კლუბი "საბურთალო" 1999 წლის 20 აგვისტოს იოსებიძის ქუჩაზე მდებარე №161-ე საჯარო სკოლაში გიგა არევაძემ, ქართლოს ჭუმბურიძემ და მამუკა კვარაცხელიამ დააფუძნეს, პირველი დირექტორი კახა ჭუმბურიძე გახლდათ.

2005 წელს კლუბის მეპატრონე შეიცვალა: შპს საფეხბურთო კლუბი "საბურთალო" ცნობილმა ჰოლდინგმა, "იბერია ბიზნეს ჯგუფმა" შეიძინა; პრეზიდენტი გახლავთ ბატონი ტარიელ ხეჩიკაშვილი, რომელმაც მიზნად დასახა საფეხბურთო კლუბის ეტაპობრივი განვითარების გეგმა და წარმოადგინა აღნიშნული გეგმის პროექტი, რომლის ხორცშესხმაც ფაქტიურად მეორე დღიდანვე დაიწყო; ხოლო კლუბის გენერალური დირექტორი ბატონი კახა ჭუმბურიძე გახლავთ. 

დაარსების დღიდან კლუბში თავმოყრილია გამოცდილი სპეციალისტების (ადმინისტრაცია, მწვრთნელები) ჯგუფი, რომლებიც თავიანთ გამოცდილებას უზიარებენ მოზარდ თაობებს. ამას ნათლად ასახავს ის ფაქტი რომ 1999 წლიდან დღემდე, საფეხბურთო კლუბ „საბურთალო“–ში მრავალი ნიჭიერი ფეხბურთელი აღიზარდა. 

ჩვენი აღსაზრდელები საქართველოს სხვადასხვა ასაკობრივ ნაკრებებში ირიცხებიან და მონაწილეობას ღებულობენ საქართველოს ფეხბურთის ფედერაციისა და თბილისის ფეხბურთის ფედერაციების მიერ ორგანიზებულ მატჩებში. საფეხბურთო კლუბ „საბურთალო“–ს აღზრდილები არიან გიორგი ჭანტურია და ვაკო ყაზაიშვილი. ორივე მათგანი საქართველოს ეროვნული ნაკრების კანდიდატები არიან. ჭანტურია 1,5 წლით საფეხბურთო კლუბ „ბარსელონა“–ში მათივე მიწვევით იჯარით იმყოფებოდა, შემდეგ შრომითი კონტრაქტი ჰოლანდიის საფეხბურთო კლუბ „ვიტეს“–თან გააფორმა, 2014 წლიდან კი იტალიურ "ვერონა"-ში ჩაირიცხა. რაც შეეხება ყაზაიშვილს, ვაკო უკვე რამდენიმე წელიწადია ჰოლანდიურ "ვიტესის" ღირსებას წარმატებით იცავს. ასევე საზღვარგარეთ სტაჟირებაზე იყვნენ ბაჩანა არაბული (კიევის "დინამო", მანჩესტერი), დავით ხოჭოლავა (ემპოლი), არჩილ ტვილდიანი (მოსკოვის სპარტაკი), ჯემალ ტაბიძე ("ლივერპული", მადრიდის "რეალი"). უნდა აღინიშნოს, რომ ლევან ყენია ადრეულ ასაკში, ჩვენს კლუბში ვარჯიშობდა. 1993-1994 წლებში დაბადებული ჩვენი 9 ფეხბურთელი ჩაირიცხა საფეხბურთო კლუბ თბილისის „დინამო“–ში, ხოლო 1992 წელს დაბადებული 2 ბავშვი საფეხბურთო კლუბ „ზესტაფონ“–ში. მსგავსი წარმატებები საფეხბურთო კლუბ „საბურთალო“–ს არაერთი აქვს, რაშიც დიდი დამსახურება მიუძღვის კლუბის სწორ მენეჯმენტს, კვალიფიციურ მწვრთნელებსა და სკოლის ინფრასტრუქტურას. 

შპს საფეხბურთო კლუბ „საბურთალო“–ს ერთ-ერთი პრიორიტეტული საკითხია ინფრასტრუქტურის განვითარება. კლუბს აქვს 5 მცირე ზომის მოედანი იოსებიძის ქუჩაზე, ასევე 2 მცირე ზომისა და ერთიც სტანდარტული ზომის სტადიონი ("ბენდელა") ასათიანის ქუჩა №7ა –ში (სამედიცინო უნივერსიტეტის მიმდებარე ტერიტორიაზე), სადაც განთავსებულია კლუბის ადმინისტრაცია, vip-ლოჟა, სამედიცინო ცენტრი, კეთილმოწყობილი გასახდელები, საშხაპეები და ყველანაირი პირობაა შექმნილი ფეხბურთელებისთვის.
2011 წლიდან ზაზა ბენდელიანის სახელობის სტადიონ "ბენდელა"–ზე ტარდება ყოველწლიური, ტრადიციული საერთაშორისო ტურნირი:
2011 წლის დეკემბერში – "ვოლკსვაგენის თასი", სადაც მონაწილეობდა საფეხბურთო კლუბი "ვიტესი" (ჰოლანდია). ამ წელს გამარჯვებული "საბურთალოს" გუნდი გახდა. 
2012 წლის დეკემბერში "ვოლკსვაგენის თასი" "სალერის თასმა" ჩაანაცვლა, სადაც მონაწილეობდნენ "ვიტესი", "მალაგა", "საბურთალო" და "ლოკომოტივი". ამ წელსაც პირველობა არავის დაუთმო ჩვენმა კლუბმა.
2013 წლის მიწურულს იგივე ტურნირზე უკვე ჩვენ გუნდთან ერთად მადრიდის "ატლეტიკომ", უკრაინულმა "დნიპრომ" და ებრაელურმა "მაკაბიმ" იასპარეზა. "სალერის თასის" გამარჯვებულიც ამჯერადაც "საბურთალოს" გუნდი გახდა.
2010-2011 წლებში თბილისის ფეხბურთის ფედერაციის მიერ ყოველწლიურ დაჯილდოვებაზე, საუკეთესო სკოლად "საბურთალო" დასახელდა. 2011-2012 წლებში კი "საბურთალო" (1998 წლიანების გუნდი) საუკეთესო გუნდად სცნეს. ამავე ორგანიზაციის გამოკითხვით, 2012-2013 წლების საუკეთესო სკოლად კვლავინდებურად ჩვენი სკოლა გამოარჩიეს, ხოლო იმავე წელს საუკეთესო გუნდად კვლავ "საბურთალოს" 1998 წელს დაბადებულების გუნდი აღიარეს.
2013-2014 წლების სეზონზე "საბურთალომ" პირველად იასპარეზა საქართველოს ჩემპიონატის პირველ ლიგაში. 
2014-2015 წლების სეზონში "საბურთალო" გახდა პირველი ლიგის გამარჯვებული და მოიპოვა უფლება 2015-2016 წლებში უმაღლეს ლიგაში ასპარეზობის.
2015 წლის 13 აგვისტოს "საბურთალომ" უმაღლეს ლიგაში სადებიუტო მატჩი "ცხინვალთან" ჩაატარა.
2015 წლის სექტემბერ-ოქტომბერში "საბურთალომ" პირველად იასპარეზა ევრო ტურნირებში. უეფას ახალგაზრდულ ლიგაზე ჩვენი გუნდი დანიის "მიდტიულანდს" დაუპირისპირდა.

2016 წლის გარდამავალ ჩემპიონატში "საბურთალო" ევროპის ლიგის პლეი-ოფის საგზურისთვის ბრძოლობდა. თბილისის დინამოსთან ორ რაუნდიანი მატჩი მეტოქის მინიმალური გამარჯვებით დასრულდა. ჩვენი გუნდი ამ წელს საბოოლოდ მეხუთე ადგილზე გავიდა.

2016 წელს საბურთალოს U-19-მა ჩემპიონობა მოიპოვა და 2017 წელს უეფას ახალგაზრდულ ლიგაზე კვლავ მიეცა ასპარეზობის საშუალება. 

 

IBG-logo vtb  unnamed   fb saller    image-687a20977fc3ea29d8342100add924b0faedcb281d2da4d0d7ecf6402e16846f-V geocell logo 15220 mc ax